زمـــــن أغبــر

زمـــــن أغبــر

زمن ما اقدر اوصفه الا بزمن المصالح البحته .. زمن زفر اللي الناس بدت اتقيّم بعضها بشكل يقولك "انت جم تسوى" ؟؟ "واشعندك من مركز / رصيد / معارف .. اي شي .. بس المهم عندك شي مقابل خدمتي لك" !!!هذا ابساطة حالنا اليوم واي واحد مو امصدق خل يسأل اهله وجماعته ويشوف ان كان كلامي مبالغ فيه ولا لأ. يسولف لي واحد دبلوماسي في وحدة من سفاراتنا في الخارج.. ما خلا احد ما اخدمه وقت ما كان في السفارة .. لا من معاملات علاج لا من فيز لا من تسهيلات قنصلية .. كانت الناس اتشرررّق فيه .. بيض الله ويهك ما ننسى جميلك .. الخ الخ .. تقاعــد بعـــد 15 سنة ورجع الديرة .. في هال 15 سنة كوّن معارف مالها اول ولا تالي.. ومو اي معارف.. قام ذاك اليوم احتاج يكلم واحد من المسؤلين "من اللي كانوا يتشرّقون فيه" .. قام واتصل فيه

المتقاعد: سلام عليكم

المدير: وعليكم السلام

المتقاعد: بوفلان .. معاك فلان الفلا..

المدير: ياهلااااااا .. هلا هلا هلا .. شلووونك بووو

المتقاعد:بخيررر عساك بخيررر

المدير: ها شلوووون اموووركم بشرني عن صحتك ؟؟

...المتقاعد: بخير ابشرك اموري كلها طيبة .. حمدلله تقاعدت وردينا استقرينا

المدير: هاااا .. تقاعدت ؟؟

المتقاعد: اي خلصنا .. بس بعد

المدير: يالله الحمدلله .. الله يسهل امورك

...المتقاعد: مشكور .. الا بوفلان بغيت اسألك عن

المدير: ايه .. اممم .. ايه ان شاء الله

المتقاعد: مادري .. شرايك؟

المدير: اي خل اشوف..اخذ هالرقم واتصل على الاسبوع اليا..

.. !!! وهذا ويه الضيف

هالمدير كان في يوم يركض ورا الدبلوماسي .. لكن للاسف هذي سنة الحياة.. بالاحرى، سنة الحياة اليديــدة

هذي قصة من الف قصة وقصة .. تؤكد ان 99% من الناس قامت تقيمّ بعضها البعض على اساس المصلحة وبسسس .. لا صداقة بو 30 سنة تشفــــع ولا قــــــرابة من الدرجة الاولى تشفــــــع ولا شي ثاني يشفـــع

المصلحـة وبس.. اهي بروحها بهالزمــن اللي تشفـــع !

عسى الله لا يعوووووزنـــــا لأحــــــد

ولا عـــــــزاء للكــــرامــــة

مو بس بروحك

اليوم قاعد اقلب الصور جان اشوف صورة لي قبل 10 سنين، اشوي ولا صورة ثانية قبل 18 سنة .. المهم قعدت اقارن اشوف الصور

.. والاحظ التغيير اللي صار على شكلي وملامحي

اول ثانية حسيت باحباط خفيف ! مادري ليش وايد ناس يحسون بهالاحباط من سالفة السن .. احباط اشمنه مادري .. هل اهو من مقارنة انجازات الشخص مقارنة.. بعمره ؟؟؟

ولا بسبب اختلاف الملامح بس ؟؟ ولا لانه سنوات عمره .. قـلـّت ؟؟

مادررري ولكن شي واحد وخفف الاحباط اللي حاشني.. ان كل عيال جيلي معاي بالصورة .. وكل اصورهم تغيرررت .. ومو انا اللي بروووحي اكبر واهم بعدهم شبــاب .. لو بس انا بروحي اللي من بد جيلي قاعد اكبررر .. جان شلون بيكون احباطــي؟؟؟ ما اقول الا .. الحمــدلله

وضعنا مع الـقــــدر

علاقة القدر بالانسان علاقة غـيبـيّـة من الدرجة الاولى.. علاقة تحــدد توجهنــا ومسارنا في الحياة.. علاقة تخفـي لنــا كل انــواع المفاجئـــات، مفاجئات ســارّة .. كئيـبـــــة .. كل شي

عاد تخيــّــلت الـ

(roller coaster)

لانه الاقــرب للقــدر وعلاقته في الانسان

الواحد منـّا مثل اللي قاعد في عربانة مفتلتــه، ما يدري شخاش له القدر.. ولا عارف شاللي راح يصادفه في رحلته وفي مراحل حياته. الكوستررر فيه لفاااات حلووة واتووونس .. وفيه لفاااات قشررررة اتوقف القلب .. مثل الدنيــا، اتمر علينا احداث اتودينا فووووق ، وتسعدنا اكثر من ما انتخيل، وباوقات ثانية اتمر علينا لفااات ومواقف قشرة اتردنا 10 سنين ورا.

انسان حالته المادية بسيطه اذا مو كسيفة واوضاعه ككل تعبانة .. وفي لحظه، اتغيير كل احواله الى شي اقرب للخيال .. جاه وخير وكل اشارات الشارع شابه له خضره.. جنها تنطرره. في المقابل، انسان وضعه فوق الممتاز.. خير ونعمة ومنصب وصحة .. فجـــأة .. انقلب حاله من حال إلى حال اسوأ، والاشارات كلها مسدددودة

ودام هذا وضعنا مع القدر، حلو ان الواحد يعلـّم نفسه شلون يتقبل اللي مكتوب عليه بكل رضى وإيمان .. لسبب واحد : ان اللي كتب علينا هالشي.. مو شخص ولا اميررر ولا وزيررر .. ولكن، رب الدنيــا كلهـــا

فمحدددد يقدر يغير شي من المكتوب علينــا ولكن ..الواحد منا ما له الا حل واحــد ومضموووون

يطلب صاحب الشأن

اللهم لا نسألك رد القضـاء، ولكن نسألك اللــطف فيـه