15/10/2008

كلام الغزو.. يمحيه النهار


عندنا مشاكل ؟ نعــــم
عندنا استياء ؟ نعــــم
عندنا سخط ؟ نعــــم
عندنا كلام ؟ نعــــم

بالنهاية، عندنــا وعندنــا

بس الأهــم، ما سألنا انفسنا اذا في دولة تخلـى من اللي عندنا ؟؟
هل في دولة خالية من الأخطاء والعيوب ؟

هل في دولة كاملة من جميع النواحي ؟

ما اعتقـــــد
ولاني ما أعتقد
مستعد اقدم شي للي ينورنا ويقولنا
عن دولة خاليــــة من الأخطاء والعيـــوب
وله ارض 1000م ثلاث شوارع

:في مقولة تقول
The grass on the other side.. is ALWAYS greener

هذي حقيقـــة
طبعا محد يفهم ويعي ما تعني هذي المقولة
الا من تغــرب
أكرر .. من تــغـــرررب مو تـسـيـــــح
من دررس في الغربة
من إشتغل وكد في الغربة
هو اللي يعرف
وهو بس من يعرف إن كل دولة لهـــا وعليهـــا
لها ايجابيات وعليها سلبيات
وهو بس.. من يعرف ماذا تعني ( الكــــويــــت ) بـ .. سلبياتها

***

أثناء الغــــــزو
كنا نقول راضين فيها حتى لووو هي .. خرابـــة

علامنـــا نسينـــا ؟

يا سادة يا كرام
هل الطمع والشجع هو من أنسانــا ؟
ومحى .. كلامنــا ؟

38 comments:

Yin مدام said...

والله ورجعتنا لذيج الأيام

كلامك صحيح
وعشت بدول لها من السلبيات التي يشيب لها الرأس

وعندنا وايد مشاكل بس أعتقد يا لندني إن الأغلبية تتكلم من منطلق حب البلد ورغبة بتطويرها لأن عندنا مشاكل وايد مفتعلة وكشعب محب إلزاما علينا أن نتكلم ونضع حلول لا أن نتحلطم لمجرد النقد
ويمكن يمكن أحد يسمع راينا ويدرس حلولنا وترى النور
ديرتنا تستاهل أحسن من جذي
إن كان من حكومة ولا مجلس ولا شعب
والله يعطيك العافية ويرزقك على قد نيتك يا لندني
خوش بوست
:))

ملاحـظـة said...

كلام صحيح و طبعا ما في دولة خاليه من العيوب
او يوتوبيا على كما وصفهاافلاطون

بس انا عن نفسي -و اعتقد في كثير مثلي- طلبنا مو ان تكون الكويت خاليه من العيوب

انما طلبنا وسخطنا ، ان هالدولة فيها عيوب ممكن بالسهولة و بشوية علم على شوية حزم على شوية التزام ممكن انها تنحل

انتقادنا مو للعيوب
قدر ما ننتقد تجاهلها
و عدم المبادرة في حلها طالما نملك وسائل الحل ، او محاولة البعض حلها بطريقه تزيد من العيوب و لا تقللها

بيت شعر للمتنبي يقول
ولم أرَ في الناس عيباً
كنقص القادرين على التمام

Bloggerista said...

totally agree

الكويت بكل عيوبها تبقى وايد أحسن من غيرها
صج ما راح يحسون بقيمتها الا لي ذاقوا ظيم العيشة برة

http://q8-fashionista.blogspot.com/2008/10/31.html

check out no. 26

`~MnO YeNSa! ~` said...

انا معاك
100%
صح لسانك بس منو يسمع

اكثر ناس بالدنيا
يتحلطمون الكويتيين

والكويت ما تستاهل
كل هذا

الحمدلله
كل شي عندنا بس الناس
ما تشوف الا اللي عند غيرنا


و لما تفكر فيها
تكتشف
انه
غيرنا ماعندهم شي
ولا
حتى اللي عندهم مو لهم


ماكو احسن من
ديرتنا
at all
الحمدلله

Anonymous said...

9a7 lsaanik.
3asa Allah ykhaallee deeratna.

I whole heartedly agree with every word you've said.

Allah ya36eek il3aafya oo y'ajrik 3ala niyyitik :)

Rose said...

الانانية
وحب الذات وراء هذا الشعور الكويتي البحت
كل واحد يشوف انه ملك وخالي من العيوب
عينوا انفسهم نقاد من الدرجة الاولى
انتقدوا كل فرد وكل شي بالبلد
وماكو شي عاجبهم
ينتقدون يتحلطمون ويعصبون وممكن يسبون
بس ولا واحد فيهم بدا بنفسه
نظر الى عيوبه
حاول يصلحها
ولا واحد حاول يقدم حلول
يعطي البلد بدال ما يفكر انه ياخذ وبس
موضوع الكويتيين الممتع صار كل ما يتعلق بزيادة ومنحه
يا جماعة نحن جدار الوطن
اذا استمرينا بالانتقاد
لن يكون هناك اصلاح
ولا بناء ولا تطور
بل سيزداد ذلك التصدع في ذاك الجدار
وسنستمر في السير الى الوراء
ليس بالكلام وحده تتقدم الدول
المقولة الشهيرة "من سار على الدرب وصل ومن زرع حصد"

لكنهم شعب يعاني من السمنه...!!
والمشي رياضة متعبه بالنسبة لهم
لان حتى جو الكويت مو عاجبهم
.
.
عذرا لكم فالحقيقة مرة وهذا واقعنا للأسف

ضـاد said...

صح كلامك

حتى اللي ماتغربو في منهم حاسين بالنعمه... انا مثلك استنكر تحطلمهم على ميش وعلى ماميش

و بعدين
the grass in greener
لأن ما عليه دوس
p;

مهما كان... يظلون عيال الغزو للحينهم موجودين او حتى عيالهم و فيهم الخير

بس سبحان الله ناس تشيش ناس.. و في ناس تحب تدعي المثاليه المفرطه

ما يندرى شنهي الاسباب

بس لتحاتي... بوقت الشديد الئوي الله ليقولها تلاقيهم على قلب ( الكويت )



===
شكرا لون... قصدي لندني

===

بالمناسبه؟ تعرف ان الكويتيين قبل كانو يقولون عن كل شي يديد وشغل عدل(( لندني ))

===


:)

Safeed said...

سبب ضجتهم أنهم يريدونها دولة لتستمر و تبقى .. و ما يحدث الآن من تخبطات لا يقود لمثل هذه النتيجة

هذا هو المؤسف بالأمر ، فالمسألة هي طغيان الخوف من المستقبل و عدم التعلم من الماضي

why me said...

صاج


بس السعي نحو الافضل ضروري

enter-q8 said...

لا يا سيدي
نرضى بها بكل الاحوال نعم


و لا

لا نرضى ان يكون بايدينا ان نسعدها و نزينها و نقويها و نجملها و نعز شأنها

افهم قصدك نعم و رساله واضحة نعم لكن يا زميلي هالبلد قادر ان يكون اقوى و اجمل و افضل
و هذا الجمال و الافضلية هي دين علينا له فأعطانا ما لديه و يجب ان نعطيه

المشكله ليست بالبلد بل فينا

يجب ان نعطي و العطاء هنا يعوقه كما ذكر الاخرين

رائع كعادتك مع انك مقصر بالبوستات

Sweet Revenge said...

ياريت حتي نقدر نسميها مشاكل
الي اشوفة انه كلها تراكمات الاهمال
والكسل وسياسة "مالي خلق" و"تعال باجر"
ولا ما في مكان في العالم مافيه مشاكل احنا علي الارض مو بالجنه
:)

LonDonY said...

Yin
~~~~~~~~

ما اشك في نوايا الغالبية الطيبة وكلي يقين بان النقد
هو من منطلق الحب ولكن، كل شي اذا تجاوز حده ينقلب ضده
ولابد ان نعرف الحد اللي نوقف عنده

انتي شايفة نفسيات الناس ؟؟؟؟
هلكككانه بمعنى الكلمة.. قاعدين بزائير مو الكويت
وشاللي وصلنا لي هالدرجة من الاحباط ماغير
زيادة نقدنا ونصحنا بدون لا ناخذ بالنا
اذا احنا كملنا على نفس الوتيرة في النصح والنقد والاستياء
حتما راح نوصل لمرحلة .. ومن الحب ما قتل

تسلمين
:)




ملاحـظـة
~~~~~~~~

ملاحظة
انتي بطلبج هذا وعلى بساطته قاعدة تطلبين .. الكماااال
ولكن لانها دنيــا .. فهي غير كاملة
يمعوده احنا ابيوتنا مو كاملة
هالدور تبين الديرة.. تصير
ما عليج من المتنبي
لووول بياع احـلاااا حجي
بس بالصج والواقع.. محد كامل

لكن ما اقول غير صح السانج ولسان افلاطون
:)
تسلمين



Fashionista
~~~~~~~~~~

agree وانا

السؤال، ليش نسينا ظيم الغزو ؟؟؟ كان اكثر من غربة
ماني عارف.. نسينا تجربة الغزو ولا ما كانت تجربة كافيه؟

تسلمين





`~MnO YeNSa! ~`
~~~~~~~~~~~~~~

تبين تعرفين ليش اكثر ناس بالدنيا انتحلطم ؟؟






من زود النعمــة
ومن كثر النعم مو عارفين شنسوي بعمرنا

**الحين بيطلع لي احد بيقولي عن صندوق المعسرين**
تكفه هذاك ملف ثاني، انا اتكلم عن العموم

والف حمد وشكر

تسلمين





Bluetiful Nostalgia
~~~~~~~~~~~~~~~

صح ابدنك، مشكورة

آمين يارب ويديم علينا الامن والامان والخير والنعمه
وياجررج ان شاء الله

تسلمين

Salah said...

ايام الغزو كنا نقول ياحلو الكويت باللي فيها...

وكنا نقصد بكل سلبياتها اللي خارج عن ارادة الانسان... الحر... الغبار... وغيره

لكن كنا نقول اذا ردت الكويت ما راح نسكت حق أي واحد يحاول يضيعها مرة ثانية ان كان من حكومة أو من شعب

والله من وراء القصد

Kuwait said...

على العكس من ذلك ..
نحن نريد الأفضل لها :)
وقت الغزو كنا نقول نبيها حتى لو خرابه لان الحدث خارجي واعتداء على أمن وسيادة دولتنا ..
بينما السلبيات الحاليه هي بفعل أيدي أبناء الوطن ..
نرفض المقارنه مع أي دوله ونسعى لأن تكون دولتنا في أفضل أحوالها ..

charisma said...

صح السااانج يا لندنى
والله صدقت

سفره صغيره يومين وانا من زماان مو مسافره حسييت صج ان الكويت معززتنااا ومكرمتنااا وهذول يعتبرون دول متقدمه يعنى كل شى علييك بالحسره

فعلا مافى ديره تخلى من العيوب
ومن شاف غيره هان حاله علييه

بس هم يا لندنى يحز بخاطرنا الى قاعد يصير بالكويت وتضييق خلوقنا لما نشوف دول كنا احسن منها سبقتنا وتعدتنا واحنا مكانك سر

لما نشوف البوق عينك عينك والكويت واقفه

ليييش!!

هذا الى يحز بالخاطر

MakintoshQ8 said...

صح لسانك كل دوله فيها ايجابيات وفيها سلبيات
وهم صح انه الكويت احسن من غيرها

لكن الشعب لما يتحلطم ويتكلم يبي يقلل من السلبيات يعني بدال لاتزيد يقللونها او يوقفونها

وكل انسان يطمح بالتطوير وانه ديرته تكون احسن من الدول الباجيه

تقبل زيارتي الاولى لمدونتك وان شاء الله مابتكون الاخيره :)

ZooZ "3grbgr" said...

WE TOOK KUWAIT FOR GRANTED

هذا هو السبب
الكويت كثر ما تعطي وكثر ماهي ثابته بعطائها وما تتغير
يزيدون الأشخاص اللي ماخذينها من المسلمات

اللي عاصر الغزو وحس بلحظات الخوف من فقد الوطن وأن تعيش غريباً في وطنك الذي اغتصبه الغرباء وأنت ترى أبناءك مضرجين بدماء الشهادة على يد من يفترض أنهم أخوة لك في الدين والعروبة وجيران لأرضك .. عندئذ تختل لديك المقاييس فتعود لتثبيتها على حقيقة واحدة .. أننا لا نحيا بلا الكويت .. لذا ترى الخوف من فقدان الوطن أمرا لازم من عاصر هذه الأيام السوداء .. الله يحفظج ياكويت

وانا من عشاق التفاؤل وأؤمن أن الاحباط معدي

سووو أوخر عن المحبطين مثل ما اوخر عن المنتشلين

:p~~~~

Marwah Albahrani said...

الكويت لم تتغير ..

بل الشعب من تغير ..

شباب يعيشون بثقافات دخلية ..

من متى احنا عندنا بالكويت اللووست و الايمو ..!!

الدول الغربية تؤثر .. لكن لا تتأثر و هذه الميزة ..

لبسهم .. تصرفاتهم لا زالت توحي بالقدم .. لأنها ثابته

بالكويت تغرب عنها حتى لو 3 اشهر ترى عجبا !!

تغرب 9 شهور ..الكويت شي ثاااني

سواء باللبس .. سواء التصرفات ..طريقة الكلام ..

اللبس .. ترى هضابا فوق الرؤوس .. ناقات بسنم واحد

التصرفاات .. الجميع يعيش حياة الترف امام الناس .. اناس متصنعة تلبس اقنعة طوال فترة خروجها من المنزل

حتى اذا ما عادت اليه خلعته

طريقة الكلام .. ثلاث ارباع بنات الكويت يتكلمون بلهجة الدلع

المط و الشد و الجذب بالحجي !! ليييش

ليس دليل دلع انما مياعة و صياعة

لا اعمم .. بل اخص فئة غالبة للاسف ..

اناس بتنابحون على مفاهيم الحرية .. المحدودة ..

يتطاولون على حرية القلم البريئة .. معتقدين بذلك انهم لبسوا لباس الشرف

و تراهم يتخبطون بحرياتهم الى اسوأ و اسوأ ..

انت لا تعجبهم لأنك من الطراز القديم ..

بنظرهم انت متخلف .. و هم قد واكبوا التطور ..

اذا كان التخلف يعني الثبات على احترام الذات ..

فاهلا به ..

لن يطرح الموضوع الا من تغرب .. صدقت

لأن بعض مواكبي الخطأ .. منحازون اليه

تقبل مروري ..

عثماني said...

لندني ... شلونك يا خوي ؟؟

معاك حق والله

بس هم يكون عندي احساس ان بالامكان افضل مما كان

بالامكان نكون افضل

ليش لا ؟؟

مو بالتحلطم .. اكيد
:)

LonDonY said...

Rose
~~~~~~~~

صحيح، كل وقتنا نرصد عيوب بلدنا ولافكرنا نرصد عيوبنا
الحلول موجودة ياروز لكن "تجاهلها" هو احد السلبيات عندنا

واتفق معاج.... حقيقة مرة
لكن ماكو شي مستحيل
nabeel sh3eel :p
ونقدر انغير.. اذا عقدنا العزم

ومقولة.. من سار على الدرب وصل ومن زرع حصد
نطريني شوي بس .. بحط علامة استفهام كبيرة على هالحكمة








ضـاد
~~~~~~~~

كلمة السر .. التشيش
من بيت لي بيت ومن ديوانية لي ديوانية والخ .... كرة الثلج ماكو؟

يعني ما يحصل ونصير على قلب واحد بدون .. شدايد ؟

اي ادري بس لا .. تعليق
;p

لوندوني







Safeed
~~~~~~~~


حطيت النقط على الحروف ولا اقدر ازيد على كلامك .. ووفيت وكفيت










why me
~~~~~~~~~~

وانتي صاجه بعد

بس السؤال: هل هالنوع من السعي هو الطريق؟؟

نظرة منج على 18 سنة فاتت .. وتعرفين الاجابة








Enter-Q8
~~~~~~~~~~~~



بوليد .. صرنا مشهورين بإستياءنا !! واللي يسلمك وين العطاء؟
انا معاك .. ممكن نقدم لوطننا بس مو بالطريقة الحالية
لانها واضحة للقاصي والداني انها مو طريقة عطاء كثر ماهي هدم

ياخوي الخليجي تغيرت نظرته لنا من استيائنا الزايد
وتعاطفوا معانا لانهم مصدقين .. طلعنا محترفين بالمبالغة
لان الواقع يقول ان اوضاعنا احسن بوايد من اوضاع دول المنطقة


مرورك والله.. هو الرائع








Sweet Revenge
~~~~~~~~~~~~~~~~

"احنا علي الارض مو بالجنه"
:)

صح السانج
وهذي هي الفكرة بالضبط..

لان لسان حالهم يقول
يا تكون كاملة.. يا انحرقها .. بمحبتنا طبعا








Salah
~~~~~~~

وانا معاك اذا مو قبلك واشد على ايدك واقولك لا تسكت عن الخطأ
لكن ضد الاستياء على اللي يسوى واللي ما يسوى
وثق ان التحلطم *الزايد* على الشاردة والواردة .. هالمرة
هو الكفيل بضايعها .. مرة ثانية







Kuwait
~~~~~~~~~~~

متأكد انج تريدين الافضل
بس ماني متأكد اذا تقصدين الطريقة.. الحالية
لان مرت علينا 18 سنة من التحرير الى يومنا
هذا وما شفنا من الطريقة الحالية غير فخار يكسر بعضه
لا استفدنا ولا تطورنا .. ومتأكد ان مو من الحكمة
انج تقصدين الاستمرار على نفس الوتيرة

مثال الغزو هو مثال من بين عدة امثلة
تبين حاجتنا الماسة للاحساس بالامان والاستقرار
اذا مثال الغزو ما ناسبج، اختاري اي مثال ثاني يوصل المعنى المطلوب
نبي استقرار ونبي أمان

على فكرة، لا تنخدعين بكون الشأن داخلي او خارجي
لان الشعور بالاستقرار بالنهاية.. واحد
ومعمعة الشأن الداخلي لا تقل اهمية لانها كفيلة بسلب المواطن هذا الاحساس



*****************

اشكر الجميع

لين said...

"الكويت .. الكويت .. الكويت و تهمنا الكويت و عشان نحل مشاكل الكويت .... "أحيانا أحس إن مشكلة الكويت إهي الناس اللهي يتكلمون كأنهم بيحلون المشاكل إذا تكلمو و ما فيهم غير تحلطم على الوضع و تشكيك بقيادات البلد ..
الكويت أحسن من غيرها من الدول و لله الحمد .. ونطمح للأحسن .. نطمح حق ناس تشتغل و تقول أنجزت .. ناس لي تكلمت تعطي حلول ما تزيد الطين بله!

بس said...

صج داش هرض و الدليل أن ورى البوست اللي امعلق فيه ثلاثة ماادري اربع بوستات ؟؟

مشكور عزيزي

موضوعك عجيب بس مثل ماقال عثماني نطمح الي الافضل ؟

الله يصلح الامور و يديم علينى هالنعمة

LonDonY said...

charisma
~~~~~~~~~~

كاريزما .. انا ما قلت لا نتكلم وخل نسكت ونرضى بالواقع
ولا قلت لا نساهم ولا نصلح اللي نقدر عليه.. ابدا ما قصدت هالشي
لكن ابي واتمنى ان نكون منطقيين حبتين
انا وانتي والغالبية العظمي مع
النقد *الـبـنـّاء* واللي فيه مصلحتنا ومصلحة ديرتنا
لكن يحق لي أستاء من حالة الاحباط اللامعقولة
اوكي .. بوق ؟؟؟ عندنا.. زنا عندنا رشاوي عندنا
وهذا امر الله في الدنيا
كل بقعة في العالم فيها اللي فيها
شنبي الكويت تكون ؟
ناصعة البياض ؟؟؟؟؟ من بين كل بلدان العالم
ما فيها ولا غلطـــــــــــة ؟؟
هم ما يصيرر
كل اللي علينا .. المحاولة واصلاح ما افسده الدهر
لكن مو لان فيها سلبيات .. انحرقها بنقــد من العيار الثقيل
ونخلي اللي ما يشتري يتفرج.. ويكون التشاؤم عنوان زاوية في حياتنا
مثل ما انتي شايفة، الوضع الحالي الكل متشائم
من كل شي.. وعلى اي شــــي

تسلمييين
:)






Makintosh
~~~~~~~~~~

انتمنى والله يا ماكنتوشة

وحياج الله :)







ZooZ "3grbgr"
~~~~~~~~~~

WE TOOK KUWAIT FOR GRANTED
صح السانج يا زوز
فور قرانتد لا وعلى طبق من ذهب

بس اتصدقين ان عطائها مــو ثابت
المشكلة قاعد يزيد مع مرور الزمن
بس المشكلة الاكبر انه مو مبين في عيون المتشائمين
عيون اهل الهاتلي
يقولون قبل
راحوا اهل الهاك ويوو اهل الهاتلي
ياخذون بس ما يعطون

ولان النعمة زوالة
ما اتمنى ولا انتي ولا اي كويتي ان نضطر
وننحط بظرف قاسي مثل ما تفضلتي اللي يخل مقاييسنا
ويلزمنا نرجع ونذكر الحقيقة المهمة
.
.
اننا لا نحيا بلا كويت

وشكلي بتحاشاهم مثلج
:p~





Marwah Albahrani
~~~~~~~~~~~~~~~~

اهلا مروه
اكيد ما اعجبهم
على قولتج متخلف ومن الطراز القديم
بس خلهم على فالهم
كل الطيور تغرد
وكلن يغني على ليلاه
وانا مقتنع في ليلاي
وسواء رضوا او ما رضوا
هذي قناعة خاصة فيني ومتأكد في ناس تشاركيني فيها
في ناس ما تمشي مع الزخم
وفي ناس ثانية، مثل ما ذكرتي
بسرعة يبلعون الطعم
وينزلقون مع الموجة القوية
ايا كانت، اجتماعية سياسية اقتصادية
المهم تكون موجة قوية وبس
والدليل
مثل ما قلتي
خل احد منهم يسافر ويستقر خارج البلد سنة وسنتين وثلاث
تشوفينه / ها.. نسى قناع الرفاهية المصطنعة
واللي كان ملازمه في كل وقته بالكويت
وهذا اكبر دليل على انه شخص.. هــش

واهلا بك
:)




عثماني
~~~~~~~~~~

عثماني الغالي

ليش لا ؟؟
لانها ببساطة دنيا وكونها دنيا، فهي غير كاملة

بالنهاية، راح نحاول اصلاح ما يمكن اصلاحه بس مثل ما تفضلت، مو بالتحلطم
:)







لين
~~~~~~~~~~

فئة كبيرة تشاركك الراي
ان المشكلة فينا مو فيها
ومثل ما ذكرتي، الغالبية الصامته تبي
ناس تطمح للاحسن
بدون مزايدات وبدون لا تزيد الطين بله

منورة
:)





بس
~~~~~~~~~~

آمين .. وانا وياكم


...

وين راح البوست دورته ما لقيته؟

بس said...

موجود وين يروح بس هذا بوست قديم و انا امنزله عقبه سته تقريبا :))


هذا لنكه

http://kwt0bass.blogspot.com/2008/10/blog-post_12.html

LonDonY said...

بس
~~~~~


يمكن ما شفتي الوصلة؟

بس said...

لندني


شفتها و حطيتها بعد مشكور عجيبة:))

نون النساء said...

راضيين بالسلبيات

بس ما نرضى ان الكويت ترجع عشر خطوات ورى وغيرها إللي توهم يقولون ياهادي يسبقونها بكل شي


سلبيات عن سلبيات تفرق
وغيرة البعض على الكويت اللي فعلا يحبون هالديرة إهيه سبب التحلطم الحاصل


ماعدى سلبية وحده
تعليق الإتحاد الكويتي للكرة
مستناااااانسة
مااكووو مباريات فكككككه
باجي بس البليستيشن
يصادرون الألعاب

<<< ماااااحبهاااا

vancouver said...

totally agree
totally agree
totally agree


I wish I'm in Kuwait right NOW !!
I'm sick of being so far from my home my dear dear country
:((((

بنت الشاميه said...

اه يالندنى
من يسمع ومن يفهم
مقولتى الوحيد
كل من يبدا بنفسه ...ويحاول مع اقرب الناس معاه......احنا ما نقدر نصلح الكون...لزم نعيد بناء انفسنا لبنه لبنه
والله اعدت على شريط الغزو بثواني
وحسيت بحرقت قلبى فى هذيك الايام
الله لايبيها
وما لنا الا الدعااااء لها
بصلاح ابنائها وصلاح نواياهم

الخيلاء said...

مساء الخير

:)

الناس بس اتشوف الجانب الفاضي من الكأس ما يشوفون الجانب الممتلئ

و كل مكان بالعالم له سلبيات

بس مشكلنا انه انركز على السلبيات
بالمجلس
بالاعلام
بالدواوين
باليمعات

و كثر ما اتكرر هالسلبيات
تركز بمخنا و مانشوف غيرها

بس لو بنشوف الجانب المشرق
من كويتنا بنلقه انه ما تساويها بلد

:)

Mamloo7a Q8ia said...

صح لسانك يا خوي
بس غصبن علينا نتحلطم من حر ما فينا ومن حبنا الكبير للكويت
ولان ودنا لها بالاحسن
الله يحفظ هالديره الغاليه ويآمننا فيها

ميرامار said...

كلام جميل

بس المشكلة ان خرابها مو منها من بعض اهلها

LonDonY said...

بس
~~~~~~~~

الف عافيه








نون النساء
~~~~~~~~~~~~~

عيل مبروك عليج تعليق عضوية الاتحاد
:p

نون قلتي ان في سلبيات تفرق عن سلبيات بس اللي الوضع الحالي اللي انشوف
انها ماعادت تفرق .. بلمحة سريعة على مؤشر التحلطم اللي بلغ اعلى مستوياته


انا واحد من الناس بديت اشك بهيك غيرة
اللي ممكن مممممكن تنقلب
في أي وقت وتصير وساس قهري



حياج :)




vancouver
~~~~~~~~~~~~

محد يعرف قدرها كثرج وانتي خارجها

انا اقول روحي سياتل الويك اند وسعي صدرج

بالسلامة،
:)




بنت الشامية
~~~~~~~~~~~~~~~~

آمــين

لخصتي الحل بكلمتين

كلن يبدى بنفسه
وازيد عليها، ويمسح
من قاموسه كلمة > واشمعنى غيري


تسلمين
:)






الخيلاء
~~~~~~~~

مساء النور

كفيتي ووفيتي
وبشهادة اهل التحلطم، اهم نفسهم
يقرون انها احسن ديرة
بس شنسوى، اذا الشريحة الكبيرة
ما تعرف تشوف غير النص الفاضي


منورة
:)






Mamloo7a Q8ia
~~~~~~~~~~~~~~~~

آمين

صح ابدنك

من حبنا لها بنوفر لها صح
من حبنا لها نسلقها سلق غلط

حرام .. صلخناها وسلقناها بما فيه الكفاية



تسلمين :)








ميرامار
~~~~~~~~~~

صح السانك.. من البعض

والمفاجأة ان هالبعض، هم اول الطيور المهاجرة

:)

Anonymous said...

الكويت كانت قبل السبعينيات تصرف ع الامارات

وحتى الى الان في مستشفيات على اسم الكويت

وفي دوار في الشارقه فيه برج الكويت

شو حاصل في الكويت

نحزن عندما نسمع الكويت لن تشارك في العرس الكروي الخليجي

الصراعات السياسيه
والديمقراطيه مرات تكون نعمه ومرات نقمه

الدول الخليجيه بدات تتقدم والكويت .....

qesat_5ayal said...

وأضيف حتى لما يقولون أن الكويت فقط اهي اللي تطلع عيوبها على الملأ

أنا أقول ان الكل يطلع عيوبه او تطلع اهي من نفسها من خلال الصحافة والاعلام


لكن هذا لا يعني أن الكويت تنقص عنهم
أو أنهم أفضل


والواحد دايما يشوف عيوبه كبيره لان يبي يشيلها
بعكس البعيد يشوفها ولا شي



الله يعطيك العافية

LonDonY said...

boahmed
~~~~~~~~~~~


وانا وغيري نحزن معاك ونشاركك الشعور
لكن ضد .. المبالغة
وهذا الاهم
بواحمد، تفحص دبي بالمجهر
وراح تعرف وقتها شنو الكويت










qesat_5ayal
~~~~~~~~~~~~~

لا ابدا، الكويت ما تنقص عنهم
واهي عينهم

واذا اتتك مذمتى من ناقص
فتلك الشهادة بانني كامل

تدرين ليش عيوبها منتشرة؟
لانها مـحـط انظار الدول
والكل عينه عليها وحاسدها وحاسد اهلها

الله يحفظها بس

chatterbox said...

س هم اذا ما تكلمنا راح يكون الحال من سيء الى اسوء

مو معناة هذا ان نتطاول وهالحجي اللي نقراه بالجرايد ونشوفه بالمجلس

اللي عنه كلام في خير خل يقوله ويصلح الاوضاع واللي يبي يسوي اكشن وحركات عشان يضمن كرسيه الدورة الياية هذا اهو الخراب بعينه وعلمه

LonDonY said...

chatterbox
~~~~~~~~~~~~~~


صح السانك، وهذا بالضبط هو اللي نبيه
ان الله يفكنا من اهل الاضواء والاكشن
ويرزقنا بناس تخاف الله.. تخاف الله ما اعني انهم ينتمون لتيارت اسلامية
لكن اعني الانتماء لتيار الدولة والدولة بس، وتبي تشتغل صحح
وتصلح وتنجز لله في لله
بدون الانتفاع ومن دون تبادل للمصالح
وترفع من شأن ديرتها
مو شأن.. الحزب والتكتل اللي تنتمي له