21/08/2006

نفضــة

البلد محتاجة "نفضـــة" بمعنى الكلمة في كل قطاعات الدولة حتى تلحق
بالركب "الخليجي" ومن ثم العالمي .. حقيقة لا غبـار عليها
الغبار او السؤال اللي يتبادر الى ذهني وذهن اخواني الكوايته هو: هل من الممكن اصلاح الاوضاع العامة للدولة .. بنفس الطاقم ونفس الكوادر الموجودة حاليا؟؟
أو أننــا نحتاج الى نفضة الكوادر الحالية قبل ان نفكر في بدء عمليات الاصلاح الفعلي .. حتى يمكن ان نؤمن وان نصدق اننــا نعـــــي ما نقــــول ؟
المشكلة بأني مؤمن حتى النخاع بمقولة .. فـاقــد الشـــــئ
*** تحـــــــــــــــــــديـــــث ***
وبمـــا أن الطاقم الحالي للرحلة لم يظهر لنا في السنوات السابقة قدرته على القيام بعمله على الوجه الاكمل، فاقترح ان يتم الاستعانة بخبرات الدول المتقدمة
O U T S O U R C E !
ليش نعيد اختراع العجلة ؟ في حلول جاهزة وعلى الرف
ان كانت مشاكل بقطاع الاتصالات او مشاكل عمرانية .. او مرورية .. او .. الخ
فلهـا حلـول وحلـول مجربة ومعمول فيها.. تجربة الاوت-سوورس مرينا فيها في حقبة الخمسينيات
الكويت استعانت في مصــر واستوردت منها الكثير من انظمتنا وعلومنا
المرحلة الحالية تفرض علينا ان نعيد نفس التجربة ولكن مع الدول العظمى
الشركات العالمية تستميت في توقيع صفقات وعرض خدماتها لنا ولغيرنا
ومن خلال التفاوض، نضع الشروط اللي نحتاجها من تدريب الكوادر الوطنية وعمل الدورات والمؤتمرات وغيرها من امور
وهذي لعبة القطاع الخـــاص .. وهذا بالضبط الامر اللي يميز القطاع الخاص عن القطاع الحكومي
استعانته في خبرات الغير
واخيرا اقول، اللي بقلبــه الصـــلاة .. ما اتطوووفه

26 comments:

a7laa7ob said...

اي محتاج حق نفضه لا ونفضه قويه بعد
لا اكيد مو بنفس الطاقم لانه الطاقم الحالي لو يبي يسوي شي جان سوا من زماااااااان
ومثل ماقلت فاقد الشئ لا يعطيه

sOulvOice said...
This comment has been removed by a blog administrator.
sOulvOice said...

لندنيييي كنت امفكرة بهالموضوع


بالوضع الحالي فششششش فايدة


برجع بالتفاصيل بعد شووي

Chai-7aleeb said...

يبيلها نفضه من قلب

شغله واحده

خل كل أصحاب القرار أقل من 45 سنه وعندهم نظره و ضمير و شوف الديره شلون بتصير

kitty said...

اىىىىىى والله صدقت من قلب يبيلها نفضه فى كل شى كل اصغيره وكبيره ،، ليش احنه جذى ولى متى

اقرب حره احتريتها على ديرتنه امس ، رايحه ازور مريض بالاميرى والله جنى داشه مزبله ازباله وانتو بكرامه ما جنها مستشفى بدال هالميتين دينار الى بيعطونه اياها عدلو احدى المستشفيات الزفت

sologa-bologa said...

تبي الصج يا لندني
مو البلد اللي يبيلها نفضة
نفوسنا هي اللي يبيلها نفضة ونفضة سنعة
نفسية الشك والغيرة والحسد وعدم الثقة والطعن بالاخرين
والتدخل بحياة بعضنا بعض ما ادري ليش واهم شي
نبتعد عن نظرية الوصاية
ما ادري ليش كل فئة تبي تكون وصية على المجتمع

اعتقد ان النفضة النفسية احسن من النفضة الادارية والعمرانية والاقتصادية والخ الخ

Mama Fusla said...

الاصلاح صار شماعة ابشوت
مسرحيه هزليه ماتضحكنا
فكره دينصوريه مغبرة,
كلمة الاصلاح صارت تعني الّااصلاح


نفوسنا هي اللي يبيلها نفضة ونفضة
سنعة
Sa7 ilsanik/ch Sologa Bologa

3ateeja said...

مثل انجليزي مؤمنه فيه
لايوجد فريق فاشل
يوجد قائد فاشل
وقس على ذلك :)

LonDonY said...

a7laa7ob
لو يبي يسوي شي جان سوااه من زمان
..وهذا اهو مربط الفرس

soulvoice-misso
لا انشاء الله فيه .. بس يبيلها طولة بال.. بانتظارج

Chai-7aleeb
صح السانك .. واقتراح يشترط توفر شغلتين في اصحاب القرار.. الاولى "عندهم نظرة" .. حدها سهلة ونلقاها بس الثانية .. حيييييل صعبة
:p

kitty
اهل التبرعات اعيزوا وهم يرقعون بس مو راضي الوضع يتعدل لوجود ناس مو مشتهية تعطي من نفسها.. وبهالحالة، حتى لو بيل غيت يتبرع.. هم ماراح انشوف شـي

sologa-bologa
اي والله صدددقت
هذي مافيها كلام.. محتاجين ننفض نفوسنا
بالدرجة الاولى حتى
نعيش عيشة كريمة وصافية
بس صعبة اتصير بالدنيا دام
احنا بشر .. حاولت القى مجتمع نجح وتوفق في هالنفضة بس ماني لاقي ..
يمكن هذي سنّة الله في كونه، وتكون هالغيرة والحسد والطعن و و.. متغلغله في جذور المجتمعات طول ما احنا بشر

طابع الوصية ممكن ينطبق على بعض فئات المجتمع اللي تبي تمييز نفسها وتاخذ راية الريادة لمجرد الريادة.. لكن اللي اعرفه ان مو كل فئات الشعب مثل هالفئة.. في فئة كبيرة من المواطنين حاسة بالمسؤلية وتبي ترد جزء من فضل البلد عليها من خلال مساهمتها بحلول واقتراحات بناءة تخدم البلد فيها، بالنهاية مو كل من يقترح بالضرورة يكون وصـي على البلد


Mama Fusla
صاجه .. كلمة الاصلاح ساعات اتصير شماعة لمن ينظر لها على انها فرصة يتربح من وراها

3ateeja
خوووش مثل
;p
بس لا زال التفاؤل موجود.. لا؟؟
لا=بالبحريني

lawyer said...

حكومتك تحتاج نفضه

رجالات البلد يحتاجون نفضه

ياريت تشووف مدونه الاخ براك

الطير الحر said...

البلد محتاجة ناس تعمل

ولا تقول ... نريد الفعل وليس الكلام

مثل النواب والوزراء وغيرهم

نبي ناس تحب مصلحة الكويت

قبل لا تفكر بمصلحتها

نبي ناس تفكر لي بعيد ..

مو لليوم أو باجر

نبي ناس تفهم شغلها !!

مو واحد خريج ابتدائي يصير

نائب .. أو واحد مو دكتور يشتغل

بالصحة ... يا جماعة الكويت ما

تستحمل أكثر من جذيه !!!

ما بقى شي ويخلص النفط

واحنا قاعدين نوزع فلوس

يمين وشمال !! يبا فكروا بالمستقبل

أبعد من عشرين سنة !!

سنعوا الكهربا والماي

والشوارع والمستشفيات !!

يا ربي ليمتى !!!!؟

سالفة قلب said...

انا معاكم الوضع مزري جدا

بس هم في حمل كبير من المسؤلية علينا

احنا شنو سوينا للكويت؟؟؟

سؤال أسئله نفسي قبل كل شي

barrak said...

نبي تعديل لكيان نبي نفضه
نبي من همومنا السوده نفضى
نبي الهم اللي فينا مرا انفضه
نبي من يحس ومن باحوالنا درى
نبي حضن نبي عين ترعانا نبي ذرى
ملينا اذيه وقطع ودندره
واذا السكوت من ذهب الكلام من فضه

Blue Ice Envy said...

Tuesday, August 15, 2006
A Bottle In The Sea!
I know that it's hopeless to write this down, but it would be so great to find what I'm looking for!
Here it goes;

I'm looking for an adult male pure breed West Highland White Terrier.

If you have one, or know someone who has one, or know someone who could help me to find one, I'll be interested in buying it!

So could you all please spread this?

I know that it's a rare breed in Kuwait, but I would love to have it, fix your price!

P.S In case you don't know how it looks like just Google it!

9ahba'a said...

صح السانك و بعد النفضة نحتاج لغرس مفاهيم
احترام هيبة القانون و الصرامة في التطبيق
و العمل من الاجل البلد و الارتقاء بالذات الانسانية

Fuzzy said...

من الناحية الادارية .. القطاع الحكومي لا ولن يستطيع الاداء بكفاءة القطاع الخاص... يجب على الحكومة تولية القطاع الخاص ادارة مرافقها لرفع الكفاءة والاداء

3AJEL said...

موضوع النفضة قديم جدا وعندما صار الغزو كانت الحاجة للنفضة ماسة ولم تحدث وها نحن اليوم نعود للوراء والكل تقدمنا بخوات

mishari said...

الا محتاجة نفضة عقول

لو بس كل واحد يقتنع باللى بايده وما يطلب ازيد وكل واحد مسوى نفسه شيخ على الباجى صدقنى احنا بخير
محد يبى يعترف ان الشعب الكويتى او الخليجى عموما شعب مغرور

B u t t e r f l y said...

و بعدين على البوستات الوطنية والسياسية

:P

ما تيوز

قلنالك عطنا شي فرايحي و فلسفي شوية


- بترفلاي

Sheba said...

total change or nothing & then maybe we'll have something left from what used to be called Kuwait.

LonDonY said...

lawyer

لا حتى نفضة حكومة ما اتفيد
الحكومة اللي وراها بتكون مثل/اذا مو اردى من اللي قبلها
بس خلاص ماظل بيها تفاؤل بفاعلية اي حكومة يديدة
نبي حل جذررري.. حل، اصدقه
....
شفت مدونة الاخ براك .. بالصميم




الطير الحر

كل كلامج دررر.. بس اتهقين يسويها البخت ؟؟؟
الحين وصلت الى مرحلة التفاؤل بالبخت..
يسويها البخت ولا ما يسويها..
اثبتت تجاربنا العملية فشل ذريع
وسيـاســـة
انتعلــم بروس القرعــان
فاشلة وادراة البلد ما اتحمّل هالمبدأ..




سالفة قلب

خبرج الدولة مثل المركب .. والامير مثل النوخذه.. واحنا البحرية
فالنوخذه من واجباته انه يملي علينا اوامره ويعلمنا شلون يبي مركبنا يمشي
بس اذا البحرية قاعدين يطالعون بعض ولا احد عارف شلون يقوم بمهمته .. شلون بنوصل كراتشي؟
فكلامج صح 100 بالميه
بس لازم الدولة اتعلمّنا كشعب
ابجديات العطــاء وخدمة البلد



barrak

اي والله
نبـــي
ذ ر ر ر ر ى

صح السانك

وفعلا هالمررّرة..
اذا السكوت من ذهب
الكلام من فضه



Blue Ice Envy
جربي سوق اليمعه
مادري وين يبيعونه


9ahba'a

حيل محتاجين هالشي
الغالبية امئمنه من العقوبة
فإساءة الادب صارت عاددديه

ذكرتيني بسوالف الشيّاب عن
عبدالله الاحمد..
للحين متصرقعين منه هههههههه
مو وقتها كانوا شباب
وشكلهم ماخذوا حقهم من الشطانه


Fuzzy

حقيقة اثبتتها التجارب



عاجل

ايام التحرير كانت فرصة ذهبيـة
ولكن لا تزال امامنا فرص .. اذا فعلا كنا جادين


mishari

ما نقدر نقنع دام احنا في دوامة اسمها المظاهر.. فعشان نقنع، لازم انحل مشكلتنا بالاول مع المظاهر تالي انعرف شلون نقنع..
اما الغرور .. فانا مرتاح من هالناحية لان عندنا طيبة لامحدودة اتخفف من حدة الغرور


B u t t e r f l y

بيوووز انشاءالله.. وحياتج المركب الياي
:p


Sheba

Total change mara wa7daa?? in this life u mean??? its waaaay hard dear

tweety said...

نحتاج نفضة
نحتاج رجفة
نحتاج زفان
بس الوضع يتعدل وانحس انه في بلد متحضر

albandry said...

bas naftha
o ba3deen shetbady wella shetbady o eykawkoonha bmo`7hom o eyfakrooon
o ey3ayzoon
o bedeen nerja3 3ala ya 6eer yally

LonDonY said...

tweety

قوولي يالله


albandry

ما عليه.. الحل عندي بس لو الله يهديهم

MiSs-ToFa7a said...

لندني النفضه ما تنفع

يبيلهم زلزااال يمكن يلتفتون بعد

ربك كريم

LonDonY said...

MiSs-ToFa7a

نفضة .. زلزال.. طراق .. اي شي بس المهم انبادر ونبدي.. مو يقولون الميل يبدى بخطوة

الله كرريم